Hafðu samband:

Siglufjarðarsaga

í hálfri miljón mynda

Myndirnar í safni Steingríms Kristinssonar á  Siglufirði eru á bilinu  400 til 500 þúsund.  Ómetanleg heimild um  mannlíf og menningu í  nyrsta kaupstað landsins.

"Atvinnulífsmyndirnar eru skemmtilegastar,"  segir Steingrímur, sem hefur tekið  myndir í fjörutíu ár.

"Ég hef aldrei talið hve margar  myndir eru í þessu safni, en þær  eru einhversstaðar á milli 400  og 500 þúsund. Að jafnaði sit ég  einn til tvo tíma á hverju kvöldi  við að skrá myndirnar og síðan  allt að 10 tíma um helgar. Mér  mun sjálfsagt ekki endast aldur  til að skrá myndirnar allar, jafnvel þó ég verði hundrað ára,`.`  segir Steingrímur Kristinsson,  ljósmyndasafnari á Siglufirði.

"Mér mun sjálfsagt ekki endast aldur til að skrá allar myndirnar, þó ég verði hundrað ára," segir Steingrímur kristinsson hér í viðtalinu. Hann situr löngum stundum við tölvu sína og skráir inn myndir, en hundruð þúsundir mynda eru í safni hans. Mynd: SBS

Eitt stærsta myndasafn  í einkaeigu

Steingrímur Kristinsson á eitt  stærsta myndasafn í einkaeigu á  Íslandi. Talsverður hluti safnsins, 250 til 300 þúsund myndir,  eru það sem Kristfinnur Guðjónsson tók, en hann var um  langt skeið ljósmyndari á Siglufirði.

Nokkuð af myndum kemur  annarsstaðar frá, en vel á annað  hundrað þúsund eru myndir  sem Steingrímur sjálfur hefur  tekið síðustu áratugi. Nokkuð er  um að myndirnar séu til á pappír, en stærstur hluti safnsins eru  myndir sem til eru á filmum eða  gleri.

Þær eru vel varðveittar við  góðar aðstæður á heimili Steingríms og aðgengilegar, - en stór  hluti safnsins er skráður og jafnvel til á  tölvutæku formi.

"Þær heilsuðu okkur með sveiflandi söng, síldarstúlkurnar, " segir í kvæðinu. Myndina tók Kristfinnur Guðjónsson, en hann var  staðar ljósmyndari Siglfirðinga í áratugi.

"Ég er búinn að eyða miklum  tíma í að tölvuskrá safnið og nú  er ég búinn að vista það sem  nemur 1,8 gígabætum inn á  tölvuna mína," segir Steingrímur.

"Ég skrái þetta með ýmsu  móti, en ég huga sérstaklega að  persónusögunni þegar ég skrái  safnið. Sjálfur hef ég búið hér  alla tíð og þekki því auðvitað  fjölda fólks sem hér hefur búið.  Þegar ég er að skrá inn myndir  man ég ekki alltaf hvað hver og  einn heitir eða hét, en man hvar  viðkomandi hefur búið. Þá er ég hér með við höndina öll manntöl sem skráð hafa verið á Siglufirði frá 1946 og því get ég oft  fljótt fundið og staðfest viðkomandi upplýsingar.

Skrái ég þá  inn á tölvuna upplýsingar um þá  sem á myndunum eru," segir  Steingrímur. Í talsverðum mæli  er leitað til hans eftir myndum,  meðal annars af brottfluttum  Siglfirðingum, en einnig hafa  söfn, til dæmis Þjóðminjasafnið,  leitað til hans í sama tilgangi.

Síldarflutningaskip við bryggju á Siglufirði undir lok síldaráranna. Steingrímur tók myndina.

Byrjaði að taka  myndir 1959

Steingrímur kveðst fyrst fyrir alvöru hafa byrjað að taka myndir  árið 1959.

Það var móðir hans, Valborg  Steingrímsdóttir, sem upphaflega kveikti í honum, en hún  hafði ung fiktað við myndatökur og "Hún hafði raunar ekki  aðra aðstöðu til þess að framkalla myndir en að nota einfaldan fixer - og ljósið sem hún hafði  við framköllunina var ekki annað en það sem sólin gaf. Filma  var erfitt að afla sér, fyrir utan  hvað þær voru dýrar.

Ég man  þegar ég þegar ég var að byrja í  þessu að erfitt var að biðja  menn sem fengust við myndatökur um að liðsinna manni og  kenna. Það var einsog maður  væri að biðja þá um gull, en einna bestu leiðsögnina gaf  Kristfinnur ljósmyndari mér."

Steingrímur hóf störf hjá Síldarverksmiðjum ríkisins árið  1950, þar sem hann starfar enn  í dag, það er hjá SR-mjöli hf.  Hafa yfirmenn þar í gegn um  árin alltaf sýnt áhugamáli Steingríms mikinn skilning.

"Vilhjálmur Guðmundsson sem var lengi  framkvæmdastjóri hérna sagði við mig einhverju sinni að ég mætti þegar þörf krefði bregða mér frá og taka myndir.

Þetta kom sé oft vel á þeim tíma, þó ég hafi reyndar í seinni tíð hætt slíku og er raunar hættur að fara á vettvang þegar eitthvað er að gerast, tek aðeins myndir þegar ég er á vettvangi,"

Segir Steingrímur, sem skráði með myndum sínum alla byggingasögu  hinnar nýju verksmiðju S.R.  mjöls hf. á Siglufirði, sem tekin  var í notkun sl. haust og tók  meðan á framkvæmdum stóð um 600 myndir. -

Steingrímur  myndaði og skrifaði um langt  skeið fréttapistla fyrir Morgunblaðið á Siglufirði og ýmis blöð  þar áður.

Steingrímur var á Haferninum sem var lýsis-, síldar- og olíuflutningaskip í eigu  Síldarverksmiðja ríkisins. Þessa mynd tók hann eitt sinn er skipið var að dóla í  gegnum ís út af Húnaflóa árið 1968.

Svipmyndir úr  atvinnulífinu 

"Alla tíð hefur mér þótt  skemmtilegast að taka svipmyndir úr atvinnulífinu," segir  Steingrímur. "Best finnst mér að  taka slíkar myndir þegar fólkið  veit ekki sjálft af, þá verður það  eðlilegast. Við þessar aðstæður  notaði ég oft 400 og 800 mm.  linsur og hef tekið myndir á 30  til 50 metra færi. Þá getur útkoman oft orðið góð." -

Steingrímur segir mörg skemmtileg  myndefni hafa borið fyrir sín  augu um dagana, líklega þó  aldrei fleiri en á blómaskeiði  síldarútgerðarinnar 1960 til  1968. Er einmitt í safni hans  mikill fjöldi mynda frá þessu tímabili, sem kannski hefur líka  verið myndað meira og betur en  önnur í atvinnusögu þjóðarinnar.

Á síðustu árum hefur Steingrímur Kristinsson tekið Netið í  þjónustu sína og með þeim  hætti miðlar hann myndum úr  safni sínum og slóðin að heimasíðu hans er ⁽¹⁾ http://home.islandia.is/baddy.

Er inn á síðuna  miðlað í viku hverri, um 20 nýjum myndum, en að jafnaði eru  þar á bilinu 300 til 400 myndir  ⁽²⁾  hverju sinni. Meðal annars setur  Steingrímur inn á síðuna myndir af fólki sem hann þekkir ekki  deili á sjálfur og auglýsir eftir  því þarna og kemst oft á sporið.  En þess utan er síðan skemmtileg að skoða, enda eru þar margar svipmyndir frá Siglufirði og  einnig skrá netfanga og heimasíðna meira en 200 Siglfirðinga,  nær og fjær. -SBS. 

⁽¹⁾  Gamalt veffang, ekki notað lengur.

⁽²⁾ Plássið sem ég hafði á þessum tíma úti á netinu rúmaði ekki öllu meira (þá 5 MB,- í dag ótakmarkað)