Það er ekki laust blendnar hugmyndir í huga mínum varðandi þessa sameiningu. En ég hóf störf hjá Síldarverksmiðjum Ríkisins árið 1950, þá 16 ára gamall en ég starfaði fyrsta sumarið á Lagernum, en yfirboðari minn þar var þá Jóel Hjálmarsson, og síðar vann ég við öll hugsanleg störf hjá fyrirtækinu. Ég var að vísu fjarverandi við önnur störf í um 12 ár ma. á sjó ofl.
Ég hóf síðan aftur störf hjá SR og þá aftur á Lagernum, þá hjá lagerstjóranum sem var Ingibjörn Jóhannsson, yfirmaður okkar var Þórður G Andersen.
Og þegar SR MJÖL HF var stofnsett, hélt starfið þar áfram. Nú er ég einn á Lagernum og kominn að sjötugu, talað er um að "loka Lagernum". Hvað felst í raun, í þeim orðum veit ég ekki, en Vélaverkstæðið hefur verið selt og við það breytist rekstur beggja staða óhjákvæmilega.
En eins og ég sagði, ég er að "komast á aldur", en er heilsuhraustur og alls ekki á þeim buxunum að gefast upp og eða hætta að vinna, ég hefi nóg að starfa og mun gera það þó ég verði settur til hliðat hjá hinum nýju yfirboðurum.
Ég mun bíða eftir að fyrirskipanir sem frá þeim berist, með reisn. -
Ég vona af einlægni að sameiningin verði öllum til góða, ekki aðeins eigendum, heldur einnig launþegum, - launþegunum sem gerir eigendunum kleift að sækja jákvæðan arð til félagsins, - launþegum bæði fyrir austan, sunnan og NORÐAN.
8.. mars 2003, Steingrímur Kristinsson, lagerstjóri, SR-MJÖL HF Siglufirði
